काठमाण्डौं, फागुन ११ गते । राष्ट्रिय बीमा संस्थानले आर्थिक वर्ष २०६२/२०६३ को ६ महिनामा जीवन बीमातर्फ ६१ करोड ५० लाख रुपियाँ र निर्जीवन बीमातर्फ रु. १७ करोड प्रिमियम आम्दानी गरेको छ । सो संस्थाको जीवन बीमातर्फ रु. एक अर्ब ६५ करोड र निर्जीवन बीमातर्फ रु. ३९ करोड प्रिमियम आम्दानी गर्ने वार्षिक लक्ष्य थियो ।

उक्त संस्थानको ३९औं वार्षिकोत्सवको उपलक्ष्यमा आज यहाँ आयोजित समारोहमा सो कुराको जानकारी दिइएको हो ।

संस्थाले बीमा ऐन २०४९ बमोजिम जीवन तथा निर्जीवन बीमा अलग-अलग गर्न श्री ५ को सरकारमा मस्यौदा पेश गरिसकेको पनि बताइयो ।

उक्त समारोहमा उद्‍घाटन गर्दै अर्थ राज्यमन्त्री डा.रुपज्योतिले यस संस्थाले आफूलाई अग्रणी बीमा कम्पनीका रुपमा राष्ट्रिय अर्थतन्त्रको भरपर्दो, ब्यवसायिक र जिम्मेवार एवं सफल वित्तीय संस्थाको रुपमा उभ्याएको छ भन्नुभयो ।

उहाँले विश्‍व व्यापार सङ्गठनको सदस्य भइसकेको नेपालले बीमा ब्यवसनयको सुरक्षा, प्रगति, प्रतिस्पर्धी क्षमता वृद्दि र विश्‍वव्यापीकरणसँग तालमेल मिलाउन ऐनमा समयोचित सुधार गर्नुपर्ने र सो सङ्गठनको प्रतिबद्बता पूरा गर्न सरकारलाई चाहिने सेवा, प्रविधि तथा सहयोग पुर्‍याउन पनि संस्थानले सक्रियता देखाउनुपर्ने बताउनुभयो ।

अर्थ राज्यमन्त्री डा.रुपज्योतिले वैदेशिक रोजगारीमा जाने श्रमिकहरुबाट लिईंदै आएको १३ प्रतिशत भ्याट लिने व्यवस्थालाई हालैको अध्यादेशले संशोधन गरि २ प्रतिशत अन्तःशुल्क लिने र सो बापत रु.पाँच लाखसम्मको विशेष बीमा दिने व्यवस्था गरिएको जानकारी दिनुभयो ।

उक्त संस्थाका कार्यकारी निर्देशक भोजराज शर्माले यस संस्थाले निर्दिष्‍ट क्षेत्रहरुमा करिव रु.११ अर्ब लगानी गरी स्वदेशी पुँजीको परिचालनबाट मुलुकको अर्थतन्त्रको विकासमा सहयोगी भूमिका निर्वाह गरेको छ भन्नुभयो । उहाँले संस्थाले निकट भविष्यमा जीवन बीमाका तीन उत्पादन बजारमा ल्याउन लागेको र निर्जीवन बीमातर्फ चिकित्सक तथा अस्पतालको कानुनी दायित्व सुरक्षणका लागि व्यवसायिक क्षतिपूर्त नीति तथा मेडिकल स्टाब्लिस्मेन्ट ईरर एण्ड अमिसन पोलिसी सुरु गर्न लागेको पनि जानकारी दिनुभयो ।

बीमा समितिका अध्यक्ष माधवप्रसाद उपाध्यायले सरकारी तथा निजी बीमा कम्पनीले अस्वस्थ प्रतिस्पर्धा गर्न नहुने र सेवालाई अनिवार्य विषय बनाउनुपर्नेमा जोड दिनुभयो । उक्त संस्थानका सञ्चालक समितिका सदस्य कमलेशकुमार अग्रवाले जीवन बीमा र निर्जीवन बीमामा संस्थानलाई विभाजन गर्दा शेयरधनीलाई प्रदान गरिएको अधिकार संरक्षण गर्न आग्रह गर्नुभयो ।

समारोहमा उक्त संस्थालाई चार पटकसम्म अधिक बीमा उपलब्ध गराउने एजेन्ट वीरेन्द्र शङ्करलाई कम्प्युटर र देई पटकसम्म अधिक बीमा उराउनुहुने श्रीमती भगवती थापालाई रङ्गिन टेलिभिजन र अन्य दश जनालाई नगद, पदक र प्रशंसापत्र प्रदान गरिएको थियो ।

सोही समारोहमा रक्तदान गर्ने ५१ कर्मचारिलाई प्रशंसापत्र प्रदान गरिएको थियो ।

                                                                                                                                   रासस